阿仙奴「讓主」響頭炮「槍」殺黑貓

猪拉多纳

英超今日開鑼，焦點當然落喺阿仙奴身上，呢支悲情球隊剛啱有隊長尹佩斯轉投曼聯，桑治亦盛傳會過檔巴塞，為咗安撫球迷今晚點都要做番齣好戲，領隊雲格手執3把新「槍」普多斯基、基奧特同辛迪卡索拉，咁猛火睇怕新特蘭凶多吉少，捧1.95倍「讓主」。（有線200及300、廣東體育周六晚10:00直播）
桑治標價1.8億可鬆人

又一個隊長離隊，阿仙奴球員同球迷唔傷心就假嘅，剛獲委任做新隊長嘅華美倫同埋會改着10號波衫嘅韋舒亞，前日就話對尹佩斯跳船感到非常失望。呢頭都未呻完，西班牙《世界體育報》尋日就話巴塞已經派咗代表去倫敦斟桑治，雖然阿仙奴初步拒絕咗1,500萬歐元嘅報價，但領隊雲格尋日就開腔承認桑治可以鬆人，估計交易會介乎1,800萬歐元至1,900萬歐元之間（約1.8億港元）。

骨幹輪住走，但生力軍普多斯基就承諾Fans會繼續帶領「兵工廠」勇往直前，今晚對住來訪嘅「黑貓」正正係沖喜良機！呢位左腳仔今戰料會夥拍另外兩位新兵基奧特同辛迪卡索拉合組鐵三角，禾確特亦有望傷愈復出，中前場人腳濟濟要收拾「黑貓」綽綽有餘。
沙夏落實加盟新特蘭

隨住賓特拿離隊，作客嘅新特蘭新季靠晒貝寧攻擊中場施斯隆數胡，弊在佢足踝受傷缺席全部季前賽，仲只係喺周三先復操，落到場狀態都未必十足啦！6場熱身賽僅獲1勝兼入得4球，領隊奧尼爾尋日滾水淥腳搵到沙夏免費加盟，不過呢位法國射手都成34歲，又冇同班隊友夾過，幫得幾多吖？更何況右閘巴士利做完足踝手術要抖幾周，中堅巴布爾甩漏多過食飯，造訪矢志捲土重來嘅阿仙奴隨時輸鑊勁。
奧尼爾遇雲格冇運行

‧阿仙奴近２季開鑼戰都有球員被逐（哥斯尼、謝雲奴）。

‧新特蘭對上7場英超作客賽事未贏過，獲3和4負成績。

‧奧尼爾過去16次喺英超同雲格交手只係錄1勝6和9負劣績。
半場鬥穩陣博0:0

阿仙奴計人腳就肯定贏新特蘭幾條街，不過睇番往績，「兵工廠」過去兩季嘅開鑼戰都開半場0:0，加上佢哋今個夏天咁多變動，成個攻擊組合都唔同晒，新特蘭客場出擊亦肯定穩陣為先，預計阿仙奴未必可以一開波就咬得入「黑貓」。大家除咗捧「讓主」之外，不妨考慮吓2.95倍嘅半場0:0波膽，甚至3.65倍嘅「和主」。