辛迪卡索拉小型炮台

猪拉多纳

阿仙奴主帥雲格預咗尹佩斯會走，一早簽定法國中鋒基奧特同德國箭頭普多斯基，佢哋都係左腳仔，但尹佩斯主要活躍於右路，「兵工廠」兩個新前鋒同佢踢法唔多似，相信要花啲時間同班隊友夾吓。

基奧特身高1米92，係正宗大隻中鋒，憑身形撞爆對手，頂上功夫甚佳，上季於蒙彼利埃成為法甲神射手，產量極高，但法甲水平唔及英超，佢仲要再受考驗。至於普多斯基就慣咗喺左路上波，佢本身波底都唔錯，射門勁度十足，但之前喺拜仁慕尼黑踢得麻麻，仲要喺大球會再證明自己實力。

另外，「兵工廠」早前簽下馬拉加中場辛迪卡索拉，呢個西班牙國腳人仔細細，技術好好，打邊或者進攻中場同樣有料到，佢處理死球功夫上乘，可望取代尹佩斯成為隊中首席死球專家。
歐莊觀望新「兵」

馬會今場對阿仙奴贏波似乎信心十足，開出1.3倍主W全球最熱，反而大部分歐洲菠菜公司介乎於1.35倍至1.4倍之間，對失去尹佩斯嘅「兵工廠」暫時仍抱觀望態度。