卡迪夫城齊章 開咧戰捧得過

猪拉多纳

上季爭升班功虧一簣嘅卡迪夫城，今季得到比拿美回歸家鄉投効，實力大增。今晚佢哋喺英冠開咧戰主場迎戰新升班嘅哈特斯菲爾德，1.7倍主勝捧得過。

（開賽時間：周六凌晨2:45）
哈特斯菲爾德未夠班

其實卡城周中喺英聯盃畢業，仲要輸畀英乙諾咸頓，但要知道當日佢哋係受周中國際賽期影響，多達8名國腳級主力缺陣，輸波都情有可原。不過今仗佢哋大多會趕及復出，其中由兩名新兵比拿美與希古臣組成嘅鋒線，二人上季喺英超都踢得唔差，特別係威爾斯人比拿美，對隊波感情深厚，話明係想嚟協助球隊上英超，夠鬥志同質素，主場出擊，要打響頭炮有幾難？

哈特斯菲爾德呢邊，上季靠附加賽先打得上英冠，實力未必夠班。周中佢哋喺英聯盃畀英甲普雷斯頓淘汰，賽後領隊格雷臣大發雷霆，話唔滿意班人演出。佢仲話本來畀機會佢哋爭正選，點知個個唔爭氣，家陣周五開咧會大變陣。球隊本來已經冇乜人孭到飛，依家再幫陣容大洗牌，仲點信得過？