祖記悲情夜誓宰拿玻里

猪拉多纳

意大利超級盃移師中國首都強勢上演！繼2009及2011年後，今屆意超盃再次安排喺北京鳥巢體育場舉行，由祖雲達斯鬥拿玻里。意大利足總紀律委員會正式宣布祖記主帥干地涉操控比賽，被判罰停賽10個月，今場可能係佢最後一次帶隊，多名球員包括胡仙歷都已公開表明，要爭取勝利獻給干地。祖雲達斯有爭勝推動力，今場捧主W。（now 633及660周六晚8時直播）
干地被判停賽10個月

祖雲達斯教練干地安因執教錫耶納時涉及操控比賽，意大利足總紀律委員會判佢停賽10個月，雖然祖雲達斯講到明會為佢上訴，但相信最多係減刑，唔能夠推翻判決，今場隨時成為干地告別戰，球員已講明會將呢隻盃送畀干地做紀念，今場唔會放過拿玻里。至於同樣被指涉案嘅柏比同邦路斯就無事，可專心比賽。

重視亞洲市場戰意盛

另一方面，祖雲達斯對亞洲市場相當重視，屬少數意甲球隊附設中文版官方網頁，故「斑馬兵團」當然希望喺鳥巢揚威以增宣傳效果。祖雲達斯去年以不敗姿態贏得意甲，高層對於球隊發展感到滿意，遂投放更多資源去擴軍，實力比起上季可謂有增無減，為加強球隊喺國內嘅品牌效應，今場意超盃確有爭勝必要。

實在「尤文」一詞在內地入門網站，長時間排行頭二十位。難得去到北京做宣傳兼比賽，梗係要把握機會省靚招牌。查實過往意超盃安排喺外地比賽，祖雲達斯都能順利勝出，2002年於非洲利比亞贏帕爾馬，2003年喺美國贏AC米蘭，今次來到北京又點會失威。
拿玻里卡雲尼未回氣

至於對手拿玻里戰鬥力已比上季減退，主要係拿維斯已被富豪球隊巴黎聖日耳門撬走，雖說另一王牌射手卡雲尼都有隨隊赴京，但呢位烏拉圭球星早前踢過奧運賽事，體力或有不足，對拿玻里爭勝構成阻力。