巴塞曼聯大格鬥

猪拉多纳

今晚有場喺瑞典舉行嘅重量級熱身賽，就係2011年歐聯決賽翻版巴塞隆拿對曼聯，雖然只係「拍跳」，但兩隊都想一挫強手，攞個頭彩迎接新球季，加上雙方多名主力歸隊，喺冇乜心理包袱之下，預計會合演一場入球騷，大盤有買趁早。

（now 640周四凌晨2時直播）

大家或者對曼聯近期嘅入波能力存有戒心，的確小弟上場曼聯對華拉倫加亦推介細盤，不過今仗情況唔同。一來對手係強隊巴塞，點都能夠激發一班紅魔球員鬥心，二來一眾參與歐國盃嘅主力亦相繼歸隊，包括射手朗尼、韋碧克、拿尼等，人腳復整。領隊費格遜考慮變陣4231，測試一下新進攻組合朗尼、香川真司、拿尼同艾舒利楊格喺前線嘅效果，甚至連路爾斯華倫西亞都要屈就踢右閘，睇得出費Sir調教進攻嘅決心。
雙方齊腳實鬥攻

至於巴塞更加唔使多講，新帥維蘭路華前線依然以美斯為核心，從近兩場熱身賽所見，呢位阿根廷球王鬥心極強，下下去盡，如此態度非常難得。連王牌球星都咁搏，其他球員亦不敢怠慢，況且沙維、法比加斯、柏度洛迪古斯等「狂牛」國腳已回歸，進攻質素有保證。不過，由於眾將狀態未弗，當該隊谷得太前時，經常出現回防唔切嘅情況，同埋防守死球仲係好多甩漏，相信今場唔會有大改善。

難得兩強相遇，熱身賽又冇乜心理包袱，雙方都希望挫一挫對方銳氣，贏波攞個頭彩迎接新球季，既然大家都想贏，攻力又有番咁上下，揀大盤冇衰。