教頭承諾拎金牌祭恩師 日本格殺「墨」論

猪拉多纳

東瀛足球力量熱爆倫奧，墨西哥男奧足今晚喺4強對日本男奧足，隨時衰喺對方手上。44年前日本曾經奪得奧運足球賽銅牌，教頭關塚隆賽前講明要殺入決賽，仲話開幕前曾經同已故恩師「約定」攞金牌，全隊鬥心爆棚平手捧得過！（有線18、63及203周三凌晨0:00直播）
墨西哥陣容削輸卡士

兩隊都冇用最強人腳出戰倫奧，但相比之下，墨西哥陣容明顯削得多，外流球員竟然得熱刺唔想要嘅前鋒杜斯山度士，「超齡球員」得開始淡出國家隊嘅堤格雷斯後衞沙斯度比較有卡士，即使墨西哥喺8強加時後以4:2搞掂塞內加爾男奧足，兼有杜斯山度士暫時入到3球，但要再過一關似乎仍欠說服力。講到底，墨西哥晉級過程中得南韓男奧足最有實力，牌面有限唔值得高估。

另一方面，日本喺8強以3球淨勝埃及男奧足，射手永井謙佑同中場東慶悟連環傷出，據講佢哋傷勢唔算特別嚴重，但呢場未必打到正選。不過咁，賽前日本教頭關塚隆話，開幕前佢去過恩師宮本征勝墓前，話明要拎金牌再去拜祭佢，仲講明要為東瀛足球再創歷史，既然日本打慣整體戰，應該唔會因為個別球員受傷冧檔，瘋狂逼搶打法食得住墨西哥地面進攻！