日本女足大爆「法」

猪拉多纳

東瀛女足傳說再起！法國女足今晚喺倫奧女足4強火併日本女足，唔容易過關。呢次係英國足球聖地溫布萊球場重建後，首次有日本球員落場比賽，主將澤穗希賽前罕有發出勝利宣言，自爆有預感贏波歷史性出席決賽，最近佢「復活」返晒嚟，平手日本女足撐得過！（有線18、63及203周二凌晨0:00直播）

上屆日本女足喺4強以2:4不敵美國女足，澤穗希話4年前京奧嘅傷痛，今日仲記得，不過呢場係溫布萊07年重建後，首次有東瀛球員踢正式賽事，最後1次出戰奧運嘅澤穗希話，直覺話佢知「粉紅兵團」唔會再輸，而且會喺足球聖地溫布萊，繼續為日本女足創造光榮歷史，最近佢踢番出巔峰水準，值得繼續撐。
法蘭西防線曳隨時出醜

事實大儀見優季同大野忍8強入波，帶挈日本女足以2:0砌低巴西女足，畀傳媒形容為「2Top覺醒」（兩名前鋒復甦），足以成為教頭佐佐木則夫嘅搶金動力，因為佢哋中場嚴密，防線又夠硬淨，只要前鋒生性，對住任何球隊都有本錢贏波，何況澤穗希向來作風低調，呢次話明有信心晉級，點可以唔信佢？

對家法國女足曾經喺上個月嘅熱身賽以2:0搞掂日本女足，但睇番今屆賽事，佢哋對美國女足同瑞典女足都守唔住，證明防線唔穩，特別係司職中場嘅隊長蘇比蘭已經38歲，連續3場踢唔足下半場被換走，面對日本女足壓迫性踢法隨時出醜，即使前線組合芬妮同戴莉質素唔曳，又部署好咗凍結大儀見，睇怕都救唔番法蘭西靚女。