老友鬼鬼 車仔畀面白禮頓

猪拉多纳

新球季即將來臨，各大球隊都會把握有限時間去操弗狀態，今晚有唔少熱身賽，其中上屆歐聯冠軍車路士將作客英冠球隊白禮頓。留意到車路士喺暑期熱身賽成績欠佳，除咗對西雅圖海灣者贏波之外，其他熱身賽發揮都係一般，就算對手只得英冠水平，車路士亦未必穩勝對手。（周六晚10時開賽）
唔在乎熱身賽成績

車路士較早前進行過四場熱身賽，除對西雅圖海灣者以四比二勝出之外，另外三場分別對巴黎聖日耳門、美職明星隊及ＡＣ米蘭都令人失望。似乎藍衣軍團對於熱身賽成績唔多在乎，美國之旅亦只不過為宣傳以及收取可觀戲金，睇怕今晚對住白禮頓，車路士都唔會拚盡求勝。

查實白禮頓與車路士關係密切，現任領隊普耶與車路士領隊迪馬堤奧，以前同於車路士做過隊友，如今迪馬堤奧以領隊身份到訪白禮頓，又點好意思落普耶面。加上白禮頓陣中都有唔少高質外援，包括前西班牙國腳維辛迪，雖然佢以前受過嚴重傷患，但技術未有退減，應可對車路士構成威脅。