科蘭掛帥國體會秤先

猪拉多纳

巴甲周日凌晨上演一場前列大戰，由近況同樣唔錯嘅國際體育會硬撼華斯高。「阿二」華斯高近6仗雖錄得5勝1和，但國體會主場硬淨兼有科蘭登場掛帥，有力終止華斯高連勝走勢，國體會小讓平半要1.77倍上盤！（開賽時間：周日清晨5:30）

每次見到國體會，「四眼哥」都會情不自禁諗起老友記、上季本地波帶領日之泉JC晨曦捧到高級組銀牌嘅教練列卡度，同埋退役返咗祖家嘅高尼路，事關兩位出色中堅正正係國體會昔日嘅青訓產品，反映呢間巴甲傳統勁旅喺青訓上有一定水準。

再睇番國體會今季防守力幾好，踢12輪只失11球，平均每場失唔到1球。如果齋計主場就更加堅，6仗僅失4球。就算今場有幾名傷兵，同埋前鋒李安度達美奧去咗幫巴西踢奧運缺陣，但迎戰華斯高都唔會太過輸蝕，事關今場好大機會係「新兵」科蘭嘅第一擊，值得大力支持！

華斯高近況堅勁，連勝聖保羅同山度士，惜作客入球能力稍遜主場，今場撞正主場防守硬淨嘅國體會，肯定受到一定考驗。