紅魔搶W騷Quali

猪拉多纳

英超班霸曼聯嘅季前熱身之旅嚟到第3站，今晚會同上海申花（馬會譯名：FC上海）拍跳一課。本來主隊都有杜奧巴同安歷卡兩個前英超巨星孭飛，不過考慮到佢哋嚟緊周末仲有場對恒大嘅中超大戰要踢，難免有後顧之憂，今鋪對住愈戰愈勇嘅紅魔鬼隨時大敗一場，一於博1.62倍曼聯「讓球客勝」啦！（now640台及廣東體育周三晚8:00直播）

紅魔鬼之前去南非踢咗2場熱身賽，礙於唔少主力仲未歸隊，半力出擊下雖然取得1勝1和，但其實踢得相當辛苦，特別係上仗只係靠碧比補時入波，先逼和到阿積士開普敦。不過依家嚟到中國，力奇就認為佢哋係時候見真章，事關上場唔輸都偷笑，班人應該知驚會踢番場爭氣波。加上話晒踢完兩場熱身賽，球員狀態都會提升，前鋒貝碧托夫都急住顯身價搵班落，中場香川真司又要向新老闆「騷哥利」，今場贏少球都唔收貨啦！
硬仗連場 周末惡鬥恒大

申花呢邊，今季喺中超真係雷聲大、雨點小，簽咗安歷卡返嚟，又搵過泰簡拿嚟教，最後搞到一鑊粥，依家要搵阿根廷名帥巴迪斯達嚟執手尾。佢哋目前最緊要係喺中超搶分，下季先可以踢亞冠盃，試問又點會喺呢類表演賽搏命吖？事實上，佢哋上周先南下嚟廣州鬥完富力，周末又要鬥恒大，連場硬仗，今仗巴迪斯達點會唔有所保留？
杜奧巴唔Fit 安歷卡死火

再者，歸隊冇耐嘅杜奧巴，目前嘅體能狀態其實仲未理想，上星期聯賽都只係踢咗個下半場咁大把，今晚就算擔正，都未必會踢到尾，幫唔到隊波幾多。至於安歷卡，佢今季嚟到中超至今只入2球，近9場聯賽都食白果，靠佢又係有心無力。

仲有，賽前有消息話球迷想睇申花班主朱駿落場鬥曼聯，球會方面都話考慮緊係咪急召身在英國嘅老闆返嚟披甲出戰。咪以為講笑呀！以前佢都試過親自落場鬥利物浦，家陣班波嘅270萬美元出場費已經袋袋平安，有乜唔敢玩吖？所以捧佢哋前真係要三思呀！