迪帥柏帥低調高效

猪拉多纳

今屆歐國盃決賽兩隊，西班牙係大熱，來到呢個階段屬意料之內，意大利見關過關，以不敗姿態入決賽，領隊柏蘭迪利居功至偉。Peter同唔少球迷都因為受到意甲負面新聞影響，加上直播比英超同西甲少，而忽略意大利國家隊。
收服巴神柏帥抵讚

呢支意大利實力唔算特別高，但勝在球員狀態好，每場都有出色表現，柏蘭迪利巧妙喺三線安排一位老將擔旗，分別為保方、派路及卡斯辛奴。三人曾經被認為係高峰已過，但柏帥成功令佢哋脫胎換骨，更犀利係收服「神經刀」巴洛迪利，意大利四強就係靠佢入兩球勝出。證明好教練唔怕壞球員，正如練馬師唔怕野性難馴嘅馬匹，如果輕易放棄，往往浪費良才。

至於西班牙今屆被批評踢法沉悶，但唔可以怪迪保斯基。由於主力前鋒韋拿久傷初愈冇入選，迪帥惟有變陣，排「４６０」無鋒陣式，加強防線及中場控球，以不敗入決賽，夫復何求。

雖然有人話西班牙靠互射十二碼淘汰葡萄牙，存在幸運成分，但從好一方面睇，可幫球員克服不擅射十二碼嘅問題，更何況射十二碼並非單靠運氣，實力亦好重要。迪保斯基同柏蘭迪利喺賽事展開前，未必係最受注目嘅主帥，正因為佢哋低調，但高效率，屬於成功嘅關鍵。

來到決賽，只有一隊奪冠，呢種係足球比賽嘅殘酷，兩隊都好熬得，意大利亦會傾向防守，抵擋西班牙猛攻，估計入球會偏少，睇好入球細。
金句：成與敗冠或亞，迪保斯基、柏蘭迪利均為格調低功力高教頭。