羅沙里奧穩操聖券

猪拉多纳

周五凌晨有兩場阿根廷甲組附加賽首回合賽事，其中乙組殿軍羅沙里奧中央銳意重返甲組，加上攻力強橫，遇上防守差勁嘅聖馬田聖祖安，主場出擊唔赦甲組兵，呢場強捧主勝。

（周五早上6時15分開賽）

先講附加賽賽制，雙方要踢主客兩回合，若兩回合計打和的話，甲組一方便自動留級，對甲組隊非常着數。講番場波，羅沙里奧中央屬阿根廷老牌球隊，自降落乙組便重整旗鼓爭升班，今季該隊亦好爭氣，尤其主場係佢哋嘅「得分之源」，除咗近兩場因一早確定附加賽資格而放軟手腳外，之前七場於自己地頭未輸過之餘，仲贏足六場，全季更只係輸過一場咁大把，令人刮目相看。
聖馬田作客腳軟

相反，聖馬田聖祖安沉淪下游，同佢哋作客成績勁曳有關，該隊近十場作客只攞到九分，當中輸足五場，更重要係佢哋連頑抗能力都欠奉，防守又差，點頂得住攻力強勁嘅羅沙里奧中央？加上賽制對甲組隊有利，迫使羅沙里奧中央於主場搏盡求大勝「打底」，主勝屬首選推介，入球大亦值得留意。

另一場聯合隊主場對聖羅倫素（周五凌晨4時10分開賽），兩軍皆屬穩紮穩打嘅球隊，特別係聯合隊，佢哋最鍾意於上半場同對手鬥磨，到下半場先睇定嚟食，因此該隊近八場賽事中，有七仗於上半場未分勝負，對手聖羅倫素作客亦好此道，呢場個「半場和」有計！