哥連泰斯輸經驗撐小保加

猪拉多纳

今晚睇完歐國盃4強未眼瞓嘅話，不妨食個早餐，等睇聽朝舉行嘅南美自由盃決賽首回合，阿根廷班霸小保加主場大戰上季巴甲冠軍哥連泰斯。兩隊上場聯賽都收起主力，不過哥連泰斯始終大賽經驗較淺，作客小保加唔似可以全身而退，朱楓睇好1.77倍主W！（有線61、201及廣東體育周四早上8:50直播）

由於巴西同阿根廷一向係宿敵，所以自由盃決賽由兩國代表對撼，自然更受到重視。小保加為咗第7度捧走自由盃冠軍，就算聯賽爭標未絕望，仍然喺日前嘅阿甲煞科戰派青年軍及副選上陣，結果輸畀男生隊1:3，最後只得梗頸四，預計今場有射手柏保路莫治、中場列基美等主力復任正選，應有望回復應有水準，中堅恩沙奧拉迪缺陣只係小問題。
小保加自由盃主場6戰5勝

哥連泰斯喺今屆自由盃一場都未輸過，上兩圈更先後擊退同胞華斯高同山度士。為應付今場大戰，哥連泰斯學足小保加，喺上場巴甲對彭美拉斯僅派副選落場，不過朱楓認為佢哋首回合作客唔容易繼續保持不敗，畢竟今次係佢哋球會史上首次殺入自由盃決賽，經驗略嫌不足，造訪今屆自由盃主場5勝1負、主勝率高達83%嘅小保加，破到蛋已經有交代。
自由盃賽制：

採主客兩回合制，今輪為決賽首回合，不設作客入球優惠，若總比數相同，會於次回合後加時作賽，再和需互射12碼決勝。