期待意西會師決賽

猪拉多纳

呢幾日見到同事同朋友都覺得佢哋好似精神過之前，大家不約而同咁話，歐國盃休息日，我哋都休息呀，養精蓄銳睇四強！

今晚就打四強首戰，葡萄牙對西班牙，大家都話「雙牙會」係一場獨腳戲鬥團體戰，葡萄牙打C朗一個。但係其實葡軍仲有拿尼、比比同施維斯達華利拿等球星，又點會打C朗一個？積Sir、克勤、忠仔就話近幾場葡萄牙啲球員好多時都交波畀C朗攻門，一來佢係隊中腳風最順一位，二來可能想造就佢做神射手。但係兩隊秤，我就覺得西班牙機會高啲，畢竟西班牙始終都人強馬壯，既有卡斯拿斯守龍，又有法比加斯、費托、沙比阿朗素、大衞施華，攻得、射得、又守得，佢哋嘅衞冕之路應該可以行多一步。
意大利有運夠贏德國

不過，呢場都唔係我最緊張，德國對我隊「第二最愛」意大利先係我最關心嘅，雖然佢哋比德國少兩日休息，對英格蘭嗰場又打咗120分鐘兼射12碼贏波，即係有運行啦，佢哋一定可以贏德國，同西班牙決戰基輔奧林匹克球場。

今個星期我請咗假，唔使醫院錄影廠兩邊走，可以全情投入歐國盃。準決賽第二場就輪到小妹做直播，我已經叉足電，到時一於以十足狀態同大家一齊撐我嘅偶像保方！不過，如果決賽真係西班牙對意大利，到時真係手心係肉，手背又係肉，唔知捧邊隊好了。