維加泰搏命波靠得住

猪拉多纳

歐國盃兩場四強，盤口都開得好辣，西班牙同德國都要讓對手半一，似乎睇好呢兩支上屆決賽隊伍晉級。今晚葡萄牙對西班牙，散戶普遍傾向信名牌，捧西班牙上盤飛數明顯較多，但小心名牌陷阱。其實西班牙今屆演出唔及上屆歐國盃及兩年前世界盃勇銳，不宜太高估，寧要下盤。
西班牙讓得辣博下盤

西班牙今屆慣用冇前鋒陣式，火力已打折扣，而葡萄牙防線屬於世界級，冇咁易失波，即使西班牙真係贏，估計都係贏一粒居多，買上盤贏半個盤唔抵玩。歐國盃開波前，可以留意今日下午日聯盃賽事最後一輪賽事，A組仙台維加泰主場對磐田山葉，如果仙台維加泰贏唔到，好可能會出局，來到呢個時候，點都搏盡。

事實上，仙台維加泰今季一直保持高水準，近五場主場贏四場，只要有正常發揮，要贏波並唔難。反而磐田山葉最近連輸兩場，失波數字亦多，有走下坡迹象，受讓都要唔過。另一場A組賽事，浦和紅鑽主場對廣島三箭，雙方都已出局，大家鬥心都唔強，考慮到浦和紅鑽讓波，揀廣島三箭下盤比較划算。
肥叔心水

葡萄牙 下盤

廣島三箭下盤

仙台維加泰 上盤