幫「三獅」吼實決賽對手

猪拉多纳

前晚係我做歐國盃以來最緊張嘅一晚，事關我愛隊英格蘭打最後一場分組賽，雖然話佢哋和波都晉到級，但係我勁想佢哋搶到首名，避一避回勇嘅衞冕冠軍西班牙。之後見到朗尼復出即「士哥」幫英格蘭贏波，簡直超開心！仲要多謝伊巴謙莫域同施巴斯坦拿臣幫手砌低法國，令我實現「三獅軍國」首名出線嘅願望。不過如果我可以好似克勤咁，飛去烏克蘭現場睇住佢哋贏波兼見球星就好嘞！
葡萄牙球星多睇高一線

周五凌晨就開始打八強，對我嚟講以後場場波都好重要，邊隊贏波都好有機會同我愛隊「決賽見」（我當正佢哋攞到決賽資格㗎啦）。今場捷克對葡萄牙，照足球術語講呢，我話葡萄牙可以「睇高一線」，因為葡軍喺「死亡之組」一場比一場好，正如大家話齋：「佢哋開始上力嘞！」何況呢班波有C朗、拿尼、比比、普斯迪加等球星助陣，實力係高過捷克，我估葡萄牙可以躋身四強。

依家除咗努力歐國盃節目外，每日我仲要好努力咁去諗吓，煮咩消夜介紹畀大家。有時仲會請教同我喺102台合作主持《Feel．純搞作》嘅大廚劉銘佳（Ken），阿Ken教咗我好多同畀好多意見我！好似之前大哥瑜話我整嘅消夜攞到出嚟試食時唔夠熱，阿Ken就教咗我一啲小秘技，結果第二日大哥瑜就改口，讚我啲嘢食夠熱嘞，即係我嘅廚技有進步啦！