還原基本步 鶴臣有功勞

猪拉多纳

前晚歐國盃踢完最後一輪分組賽，神奇隊長謝拉特妙傳朗尼入波，就咁搞掂烏克蘭。朗尼未恢復十足狀態，都有波入，令人驚喜，但最大功臣都係謝拉特，佢每場都有助攻，無疑係球隊中樞神經。領隊鶴臣同球員同聲同氣，踢法返璞歸真，亦係成功關鍵。

英格蘭今屆人腳唔齊，畀人睇淡，鶴臣同球員有自知之明，有紀律地採取防守踢法，效果比預期好。英格蘭八強對意大利，如果入到四強，好可能遇上德國，到時先至係英格蘭最大考驗。當然英軍要重演車路士奇迹捧歐聯冠軍，的確係好困難，但既然入到八強，就算機會渺茫，都好過冇機會。

有關泰利將皮球從龍門內解圍出來，難免會引起激烈討論，但米已成飯，歷史唔可以改寫，無謂繼續徘徊喺呢個爭論之上，而應該向前望。畢竟現冇高科技幫助，單靠球證肉眼判斷，總有失誤，英格蘭兩年前世界盃對德國，試過成為受害者，今次變成得益者，好難話邊個着數，邊個唔着數。
捷葡戰入波唔會多

今晚上演八強賽事，捷克對葡萄牙，葡萄牙可以秤先，皆因C朗回勇重拾信心，佢就算唔入波，都可以助攻同牽制對手，對葡萄牙非常重要。捷克自知技不如人，應該會死守，而且淘汰賽雙方踢法會比較穩陣，估計今場總入球唔會多過兩球。
金句：八強德國可勝希臘，其他三戰劇鬥難免