鬥牛國霸氣漸減

猪拉多纳

歐國盃C組最後都係由名牌西班牙同意大利晉級，「西克戰」有默契波疑雲，但大戶一於少理，臨場狂插「鬥牛國」西班牙上盤，由讓半一買到變一球、球半，基本上所有專業投X者意向都係一致，就係西班牙可以贏波晉級。

雖然西班牙臨場票如雨下，但班波踢落唔多對辦，似有托大之嫌，反觀克羅地亞打落非常積極，幾次餐士差啲贏埋，可惜把握唔到機會，踢到尾段莫氣輸波，可以說係雖敗不辱喇！

大戶一窩蜂捧西班牙，早買半一嗰班人都執半個盤，但遲入貨喺一球、球半先買就要輸半個喇，呢場贏輸唔多。

另一場普遍大戶捧愛爾蘭，由受讓球半、兩球買到變一球、球半，足足轉咗幾個盤，認真誇張！意大利最後贏二比○，班大戶輸到包頭，不過，睇番下半場戰況，愛爾蘭絕對有條件追和，班專業菠菜者條數冇計錯，只係結果未如人意，有時人算不如天算，邊計到巴洛迪利會入球咁嘅靚波先得o架！

西、意攜手晉級，肥叔認為兩隊波同樣有運，西班牙名氣大，長期讓得多，但踢落霸氣漸減，嚟緊大家都要睇定啲。至於意大利人腳始終都係麻麻，若然喺八強撞到英格蘭或法國都係難搞，前景唔多樂觀。