史卓加斯特吼半場大

猪拉多纳

歐國盃分組賽完滿結束，大家今日唔使捱眼瞓可以抖抖，阿King推介挪威盃第三圈賽事，重心放在史卓加斯特「半場大」，另串特林素「讓球勝」及基沙「讓球勝」，各位投X完畢可以早啲瞓覺等收錢。

挪威盃由於部分球隊實力太懸殊，所以經常出現大比數戰果，好似洛辛堡、白蘭恩等挪超隊伍上一圈都以「其他」波膽淘汰低組別對手。講到今圈最有「其他」味道而又有得受注嘅賽事應該係挪超史卓加斯特主場鬥挪甲諾托頓，史卓加斯特排挪超第二位，今季六場主場聯賽贏五場，發揮好穩定。相反，諾托頓排喺甲組中下游，而且今季五場作客聯賽全敗，單計近兩場作客已經失咗十球，防線穿窿靠唔住，如果嫌「主其他」太進取，可取中位數1.5球嘅1.78倍半場大。
「雙特打吡」捧特林素

另外兩場賽事，特林素主場鬥特林達倫，特林素係羅姆瑟市嘅頂級強隊，特林達倫則來自該市郊外嘅一個鄉村小鎮，規模、級數何止差一班，兩軍由於分屬鄰居，近年經常約戰熱身賽，特林素例必大炒對手，相信今次亦唔會例外，捧「讓球主勝」。

最後一場就較有冷味，甲組一哥基沙主場挑戰挪超利尼史特朗，基沙能排挪甲榜首實力有番咁上下，利尼史特朗今季作客聯賽僅一勝，冇本錢讓波，捧「讓球主勝」啱數。