狂牛小勝格

猪拉多纳

全球球迷關注嘅C組尾輪話題之戰──「格仔兵團」克羅地亞對「世界一哥」西班牙今晚矚目上演，究竟兩軍會否夾計打和2比2，將意大利踢出局呢？大家拭目以待。斯維對陰謀論不敢苟同，作為世界球壇一哥，西班牙唔會做埋呢啲丟面嘅事，不過站喺投X角度，「狂牛」表現一向慢熱，面對同樣係技術型嘅「格仔軍團」克羅地亞，未必能喺初段咬得入對手，故與其做佢哋「有默契」地和波，不如玩「半場和」仲好路。至於全場波，西班牙小勝格，客W有1.7倍亦玩得過。（now 632及660周二凌晨2時45分直播）
西班牙歎慣慢板

先講現時C組形勢，西班牙與克羅地亞以4分排第一、二位，意大利2分緊隨其後。假設意軍擊敗愛爾蘭，由於西、意及意、克之戰均1比1言和，若果克羅地亞以2比2或更大比數打和西班牙，喺3隊同得5分兼相同對賽成績之下，西、克便可憑對賽中入波較多嘅條件晉級，到時意大利贏愛爾蘭100球都於事無補。

講番場波，雖然手握咁多好牌，但西班牙領隊迪保斯基對住實力分子時，都以穩陣行先，最鍾意睇定嚟食。佢會運用沙維、恩尼斯達、大衞施華等超強嘅控球能力，透過不斷傳球消耗對方體力，再睇準機會作致命一擊，通常開波冇耐係試探階段，唔會刻意加快節奏，此時對手仍然好氣好力同你周旋，加上「狂牛」一向慢熱，需要時間撻着先至慢慢入局。

上仗西班牙能夠大勝，同愛爾蘭踢法粗糙不無關係，但今仗對手克羅地亞就唔同，呢支技術細膩、有中場大師莫迪歷助陣嘅球隊，收放自如，有力同西班牙爭取中場主導權，前線仲有把握力強嘅射手文迪蘇傑，相信「狂牛」唔敢大舉壓上。喺互相制衡下，預計兩軍早段唔會貿然搶攻，等待適當時機先至出手，半場互交白卷嘅機會唔細。
兩隊搶角數字偏高

既然贏波便穩奪首名出線，以西班牙嘅級數，要擊敗克羅地亞並非難事，冇需要打「默契波」咁奸險，該隊應可小勝而回。睇番今屆賽事，發現雙方嘅角球數字相當可觀，其中西班牙兩仗合共博到15個角球，不妨要埋角球大。
C組出線條件

西班牙：

●勝或和克羅地亞

●意大利不勝

克羅地亞：

●勝西班牙

●1:1和西班牙（計總得失球）

●2:2或更大比數和西班牙

●意大利不勝

意大利：

●勝愛爾蘭+西班牙與克羅地亞分出勝負

●勝愛爾蘭+西班牙和0:0

●勝愛爾蘭+西班牙和1:1（計總得失球）

愛爾蘭：

●已出局
同分將以下列方法定排名：

1.分組賽中有關隊伍對賽得分

2.分組賽中有關隊伍對賽球差

3.分組賽中有關隊伍對賽入球數

4.分組賽中得失球差

5.分組賽中得球數

6.有關隊伍系數排名

7.有關隊伍於分組賽之紅黃牌數目

8.抽籤