法林明高邦迪比達齊攞着數

猪拉多纳

今日阿King同大家傾吓美洲波，將焦點放在巴甲，其中山度士同哥連泰斯仲要於周中南美自由盃次回合激戰，加上今輪聯賽齊齊要作客，既然係咁，一於反晒兩隊。

山度士哥連泰斯留力自由盃

先講法林明高對山度士（周一凌晨3時開賽），後者上周中於自由盃四強首回合意外輸畀哥連泰斯，由於該隊係上屆自由盃盟主，去到四強點會唔搏埋佢呢？預計山度士今場聯賽會收起多名主力，包括射手尼馬，再看看該隊偏低嘅入球率，試問一支冇尼馬嘅山度士點樣爭勝，唔輸都偷笑啦。主隊法林明高雖與朗拿甸奴解約，但對球隊影響唔大，近五主場贏足三場，仲要場場有波入，面對冇牙老虎嘅山度士，今場主勝非常好路。
紐迪高可勝甘美奧

至於另一支要打自由盃嘅哥連泰斯，儘管有一球領先優勢，但體力消耗唔少，周中匆匆再戰，相信該隊已將注意力集中晒周中對山度士之戰，將今輪聯賽放埋一邊，仲唔益晒今輪對手主場嘅邦迪比達，主隊小讓平半好抵玩。另外紐迪高主場迎戰甘美奧，後者於巴西盃四強首回合落後兩球，預計該隊只會諗住周中次回合點樣扭轉乾坤，今場聯賽必定留力唔去盡，令紐迪高有機可乘，主勝值得留意。