話咗唔好用李察鄧尼啦

猪拉多纳

歐國盃決賽周去到昨日凌晨，終於出現第一支出局隊伍。愛爾蘭硬撼西班牙輸夠四蛋，老帥查帕東尼雖然限米煮限飯，但重用維拉中堅李察鄧尼，就點講都講唔通。呢位老將轉身慢到嘔，球隊中路防守形同虛設，面對擅於中路強攻嘅西班牙，大敗非常合理。換個角度睇，「鬥牛國」雖然大勝，並未必等於佢哋已回復巔峰狀態。

對比起決賽周列強，愛爾蘭人腳的確較曳，呢班波一向打整體戰，但要搵個較快較硬淨嘅中堅，應該唔算困難。Peter多次強調，後防球員最緊要就係速度，跑得唔夠快，畀對手一扭就食塵，咁又點做防守？喺門將基雲面前，就好似無遮無掩一樣，就算佢身手幾好都死啦！查帕東尼執教愛爾蘭多年，冇理由睇唔到呢個缺點，只能講句球隊提早執包袱，係咎由自取。

西班牙大勝弱旅，表面上威風八面，但費蘭度托利斯梅開二度，係咪真係回勇？西班牙又係咪可以踢番兩年前世界盃嘅表現？Peter對此有所懷疑，相信下場鬥克羅地亞，先可以見真章。
俄羅斯避德國搶W

今日希臘鬥俄羅斯，俄軍要奪首名，以避開極可能係B組首名嘅德國，今場會落力爭勝，捧客W。

金句：沒有後防中路防守，等於大開屋企門口。