猛火法國 燒燶烏雞

猪拉多纳

喺歐國盃D組意外帶頭嘅東道主烏克蘭，今晚乘勝追擊法國爭取連捷，可惜嘅係還魂射手舒夫真高經已曝光，奇迹唔易重演。反而以賓施馬、列貝利同拿斯尼組成嘅法國「悅目鐵三角」，上仗對住英格蘭嘅「龜縮足球」谷埋一肚火，今仗等住爆發有殺冇賠，小讓平半我捧1.85倍上盤。（now632台、廣東體育及中央5台周六凌晨0:00直播）

原本被視為D組最弱嘅烏克蘭，喺首戰對住瑞典竟然喺落後下，憑住「復活軍刀」梅開二度反勝2:1，搞到舉國歡騰。其實力奇都係「軍刀」粉絲，當年睇住佢獨力帶領AC贏完一個又一個冠軍，從無懷疑過佢嘅實力。不過已經35歲嘅佢，近年表現的確明顯跌Watt，上場發威入2球，力奇認為同嘜佢嘅分別係速度慢嘅美爾保，以及守角球時防守意識差嘅伊巴謙莫域有關，今晚想佢再發威似乎唔容易。
烏克蘭軍刀「曝光」難發威

當然，烏克蘭球迷主場力量唔可以睇小，場內氣氛肯定一面倒支持佢哋，不過咪話力奇再潑佢哋冷水，瑞典嘅經驗同卡士又點可以同法國比，「高盧雄雞」陣內球員同領隊白蘭斯都係大賽經驗豐富，點會畀你班球迷嚇倒先！
法國夠經驗唔驚主場威力

法國方面預計都係原班人馬再戰，上場狂攻英格蘭空手而回，一班攻擊球員個個都好唔順氣，仲話三獅兵死守冇骨氣，谷埋一肚火，最好梗係今晚搵烏克蘭嚟祭旗啦！

事實上，射手賓施馬今季喺皇馬踢到曉飛，經驗同射術都一流，列貝利同拿斯尼喺兩翼嘅突破能力又係毋庸置疑，火力有保證，即使防線間中有甩漏，但係頂住主隊「軍刀」同禾路連兩名老將，應該都綽綽有餘，想贏波攞3分有幾難呀！
橫數千軍

烏克蘭對賽未贏過

‧歷來喺世界盃及歐國盃決賽周嘅7個入球中，4球由舒夫真高取得。

‧舒夫真高上仗入波後，成為歐國盃決賽周最老入球球員。

‧歷來6鬥法國得3和3負。

‧係分組賽首輪唯一反敗為勝球隊。

‧近7戰得4勝1和2負，當中6場開出入球大。

法國首輪命中目標次數冠群雄

‧近22場不敗，僅次於98世界盃積基特大軍嘅30場不敗紀錄。

‧近2次喺歐國盃決賽周對主辦國均未能得勝。

‧列貝利近4次為法國出戰取得3入球及2助攻。

‧上仗7次射門中目標係首輪列強之冠。

‧上仗傳送命中率達92%為首輪列強之冠。