德國４線勁有冠軍相

猪拉多纳

睇過Ｂ組重頭戲荷蘭對德國之後，Peter夠膽講德國肯定係今屆歐洲國家盃奪標頂頭熱門。查實德國兩場演出都好好，特別係剛啱對荷蘭嘅比賽，德國四線（連門將）質素都比對手優勝得多，至於狀態及士氣更在衞冕冠軍西班牙之上。

德國當弗球員除咗前鋒馬里奧高美斯之外，舒韋恩史迪加都值得一讚，佢唔只夠淡定，傳送質素仲相當之高，馬里奧高美斯入到靚波，賽後真係要請「小豬」飲茶。

講到質素，其實荷蘭球員唔會太差得過德國好多，但最慘係個個球員都患咗「浪費機會後遺症」，埋到門前總係不知所措。仲有，呢班球員自視過高，多次傳出隊友之間及與領隊雲馬維克鬧不和，內訌事件從未停過。團隊唔齊心實屬兵家大忌，荷蘭又點會踢到好波呢！雖然荷蘭仍未出局，但形勢唔算樂觀，睇怕「荷粉」今屆又要再失望多次。
D組兩場和味濃

今晚D組兩場比賽，頭場烏克蘭對法國，尾場瑞典對英格蘭。實在D組四支球隊實力都好平均，就算名氣較響嘅英法都唔覺得有太大優勢。Peter相信D組兩場比賽都會開出和局，波膽方面屬意一比一及二比二，兩場串射乘埋都有分頭o架！
金句：荷蘭又輸震過貓王，德國兩捷奪標在望