法國封殺軍刀

猪拉多纳

D組頭場賽事，東道主之一烏克蘭於頓涅茨克迎戰法國，烏克蘭首場贏波全靠「軍刀」舒夫真高神來之筆，論整體發揮及戰術未算太出色，而且佢哋陣中老將多，接連應付硬仗體力好輸蝕。法國勝在年輕力壯，近年面對烏克蘭亦贏多輸少，法國讓平半，波童捧上盤。

（now 632及660周六凌晨零時直播）

烏克蘭首場分組賽2比1反勝瑞典，演出的確值得一讚，不過大家唔好畀勝利蒙蔽一切。烏軍上次能夠反敗為勝，全因失波後全軍壓上，加上靠舒夫真高短時間之內連入兩球才得以取得優勢，如果當時瑞典防線頂得住，往後發展隨時係第二個古仔。
舒夫真高上場搏得盡

經過上場比賽，相信大家都唔敢低估舒夫真高及禾路連呢對前鋒組合，不過佢哋上場搏得盡、體力消耗大，而且論平均年齡烏軍亦比法國高，呢點隨時成為勝負分野。法國上場打和英格蘭1比1，發揮明顯未達最高水平，而且領隊白蘭斯賽後承認和波可以接受，畀人感覺仲有大把喺手，相信餘下兩仗將會見真章。

法國近四次於國際賽鬥烏克蘭取得三勝一和，最近一次係去年熱身賽作客大勝四比一，無懼烏軍主場威力，法國讓平手、半球，上盤可放心捧場。法國進攻最大殺着係列貝利側擊，左右兩閘迪保治、艾拉後上助攻亦具效率，角球大可一試。