球王大作戰 阿根廷拍跳巴西

猪拉多纳

南美洲兩大足球強國，阿根廷及巴西將在美國進行熱身賽。雖然今場只屬「拍跳」性質，但宿敵對決，今場未必會踢得咁「友誼」。加上巴西小球王尼馬同阿根廷球王美斯窄路相逢，呢場球王「大」戰一定鬥攻！（周日凌晨3時開賽）

阿根廷近幾場比賽都踢得好主動，啱啱喺世界盃南美區外圍賽就大炒厄瓜多爾四粒，今場遇到死對頭巴西，更加唔會有保留。不過阿根廷球迷出名要求高，領隊沙貝拉上任至今仍未得到廣泛認同，無論排陣及戰術經常受fans批評，為證明自己有能力帶領國家隊取得成功，誓必砌低巴西以振聲威。故此，今場阿根廷一定會採取主動，盡量爭取入球以滿足球迷所需。
尼馬單挑美斯

對手巴西同樣要積極進攻，既為2014年世界盃決賽周主辦單位，「森巴兵團」毋須踢外圍賽就直入決賽周。為保國家隊可長期處於好狀態及維持默契，球員對熱身賽會更加認真，尤其上仗對墨西哥淨吞兩蛋，被球迷大鬧輕敵，巴西都希望挫敗阿根廷以挽回球迷信心。

大家都知南美進攻球員質素極高，世界各地具規模嘅球會，主職進攻嘅球員都來自「阿巴」兩地。其中効力山度士嘅巴西小球王尼馬去年尾於世冠盃不敵美斯嘅巴塞，今仗兩大天王對撼，誓以入球分高低！