荷蘭大賽剋死丹麥

猪拉多纳

荷蘭同丹麥過去廿年先後六次交手，荷蘭取得兩勝四和未輸過，雙方三次於熱身賽碰頭都打和，不過，當兩隊喺大賽對戰，荷蘭就會肉緊好多，對上兩次喺大賽碰頭都戰勝丹麥，而且同樣保持清白之身，包括兩年前喺南非世盃淨勝兩球，以及千禧年喺歐國盃以3:0大勝對手，丹麥兩戰於上半場都同荷蘭打成平手，但換邊後頂唔住失守輸波。
兵工廠炮手互轟！

荷蘭射手尹佩斯及丹麥射手賓特拿都是「兵工廠」阿仙奴前鋒，但尹佩斯上季在阿仙奴獨領風騷，幾乎以一人之力協助「兵工廠」取得歐聯入場券，賓特拿卻早在季前已被領隊雲格冷落，並外借予新特蘭，球季結束後「回收」，在阿仙奴前途未卜。「當起炮手」尹佩斯硬撼「生銹炮手」賓特拿，是荷丹之戰一大賣點。
決賽悲角 洛賓

「小飛俠」由2010年開始，不斷喺大賽決賽遭遇挫折，世界盃決賽不敵西班牙，上屆歐聯決賽為拜仁鬥車路士，更射失12碼累球隊飲恨。洛賓希望奪取歐國盃撫平傷痛，仲話自己願意成為「橙軍」12碼劊子手，但領隊雲馬維克未必會搵國家隊利益教飛。
新盧特立 基斯甸艾歷臣

丹麥自從白賴仁盧特立之後，好耐冇出過天才中場，基斯甸艾歷臣技術一流，足球智慧爆燈，已成為丹麥新希望。去季佢協助阿積士奪荷甲冠軍，告魯夫力讚佢前途無限：「我衷心欣賞呢名球員，佢令我諗起盧特立兄弟。」
近6次對賽成績

14/06/2010 世界盃 荷蘭2:0(0:0)丹麥*

29/05/2008 熱身賽 荷蘭1:1(1:0)丹麥

10/11/2001 熱身賽 丹麥1:1(0:1)荷蘭

16/06/2000 歐國盃 荷蘭3:0(0:0)丹麥

18/08/1999 熱身賽 丹麥0:0(0:0)荷蘭

22/06/1992 歐國盃 荷蘭2:2(1:2)丹麥*

*為中立場