荷蘭頭炮 盡數丹麥

猪拉多纳

今晚歐國盃頭場上演「死亡B組」賽事，頭場荷蘭火併丹麥。荷蘭近年慣做急先鋒，對上兩次大賽分組賽取得六戰全勝佳績，丹麥被視為此組實力最弱隊伍，荷蘭為打好出線基礎更加不容有失，荷蘭讓一球波童捧上盤。

（無綫翡翠台及now 632周日凌晨零時直播）

荷蘭今次雖然被編入死亡B組，不過睇番佢哋上屆決賽周，同樣身處被視為最難打嘅一組，對手包括當年世界盃冠、亞軍意大利及法國，結果荷蘭頭兩仗先後技術性擊倒意、法，最終以三戰全勝姿態昂然晉級，再睇兩年前南非世界盃，荷蘭同樣在分組賽所向披靡，三戰全勝取得首名出線，證明佢哋踢大賽普遍都好快入局，唔擔心有慢熱問題。
尹佩斯弗 阿費利傷愈

荷蘭、丹麥兩年前曾在南非世界盃同組，當時荷蘭於首輪分組賽以2:0擊敗對手，同當時比較，荷蘭除左閘雲邦賀斯已掛靴，其餘大部分主力仍在陣，前鋒尹佩斯狀態、埋門技術更上一層樓，阿費利傷愈復出後亦逐漸上力，加上史奈達、洛賓早前熱身賽亦踢回信心，攻力比兩年前有過之而無不及。

丹麥本身人腳不俗，一對中路守將卡積亞、丹尼爾艾格都係歐洲球壇數一數二嘅優質中堅，中場基斯甸艾歷臣亦被譽為明日之星，可惜整體實力拍埋荷蘭、德國始終稍遜一籌，而且主力羅美度、基斯甸艾歷臣、西蒙保臣都曾經或現在荷甲球會効力，有幾多斤両荷蘭眾星應該好清楚。
死亡B組不容被動

雖然荷蘭讓一球略嫌過多，但考慮到呢個對碰有格食格味道，而且荷蘭未來兩仗仲要硬撼實力更強嘅德國及葡萄牙，為免出線形勢陷於被動，今場三分不容有失，馬會足智彩主Ｗ熱至1.48倍，遠比歐洲市場為低，更顯贏波信心，捧上盤啱數。

今場馬會特別項目係估吓以下那一件事會首先發生在尹佩斯（荷蘭）身上，包括被罰黃牌、被罰紅牌、入球、開出角球、被換出或上述事件沒有發生。尹佩斯踢法唔算那渣，唔選頭兩項，另外佢係荷蘭首席前鋒，或會被盯死，如果荷蘭未贏波，被換出嘅機會亦不大，建議不妨小敲5.5倍「開出角球」，因為佢喺阿仙奴有時亦會負責開角球。