德軍大嚼葡撻

猪拉多纳

B組出線熱門德國今晚首度出師遇上葡萄牙，係整體配合迎戰個人足球，德軍已經部署好凍結葡軍靈魂Ｃ朗，加上三線人腳實力同狀態都勝一籌，今仗力足旗開得勝，黑柴捧德國主勝。（now 632周日凌晨2時45分直播）
德國強陣傷疲盡起

德國喺決賽周前兩場熱身賽先以3:5不敵瑞士，繼而2:0小勝以色列，首仗防線漏洞多，次仗前線亦出現破密集難題，不過目的都係試陣同探討問題居多，佢哋向來係大賽球隊，今仗賽前亦接連接到好消息，較早前有輕傷嘅拿姆、基迪拉同梅迪薩卡全部可以參與最後操練，而剛傷愈嘅副隊長舒韋恩史迪加同射手高路斯都聲稱已及時回復佳態，勒夫可以排出最強陣容迎敵。

德國最大優勢係新人輩出，尤其中、前場進攻線上，舒韋恩史迪加、奧斯爾、湯馬士梅拿、普多斯基，加埋後備席上嘅卻奧斯、舒賀爾尼、馬高列奧斯同馬里奧葛斯等組成嘅少壯攻擊群，由佢哋支援「神級」射手Goal老師（高路斯），威力絕對強橫。
葡軍三線比較都輸

葡萄牙熱身賽表現比德國更差，先畀弱旅馬其頓悶和，繼而主場輸畀土耳其，前線欠缺具把握力殺手，中場欠缺創造力，防線三大猛將卡維奴、保辛華同保羅費拉拿又因為同少帥保羅賓圖不和而落選，成隊波得C朗單天保至尊，但呢位巨星今季喺皇馬搏得太殘，今晚面對德軍重點招呼好難發圍。黑柴相信今仗德軍首仗可以開餐食「葡撻」，基於雙方防線都唔穩陣，入球大亦可兼顧。

至於特別項目方面，雙方喺外圍賽尾段時刻都取得大量角球，今仗角球中位數10.5可捧大盤；至於連中三元項目只得德軍馬里奧高美斯一人受注，佢今仗好大機會先任後備，相信幾難連中三元，但賠率太低根本冇投X價值。