同藝術家傾波經

猪拉多纳

以前講開天氣，對身邊啲熱浪特別敏感，所以呢排就連唔係成日睇波嘅我都感受到一股足球熱浪四面八方湧過來，因為四年一度嘅歐洲國家盃周六凌晨零時就會開波啦！
去過有感情撐波蘭

唔好以為歐國盃同我無關，其實我早喺今年四月已經衝出香港，去到主辦國烏克蘭同波蘭踩場，為now HK拍攝《歐國盃賽前衝動》，所以講到今晚揭幕戰，我都希望佢哋首戰能夠贏波而歸。其實我對波蘭同希臘班波就唔太熟，不過去開過有感情，我今晚就撐波蘭，你哋呢？

講開歐國盃熱潮無處不在，就連鍾意行商場shopping嘅女士都一定感受到。昨日就出席now TV活動，最初以為都係向市民介紹歐國盃賽事直播嘅宣傳，冇諗到原來活動係為潮人藝術家Michael Lau所設計嘅球類裝置藝術品「Ball-er」及在商場嘅足球藝術館做揭幕儀式。

平時好少可以近距離欣賞裝置藝術品，還有機會由大師級藝術家親自介紹「Ball-er」嘅設計、同佢傾波經，可算係我入行後嘅另類經驗。我仲喺會場裡率先睇到多件今屆參賽球隊嘅國家隊球衣，真有一種優越感。大家有興趣，都可以到去apm商場探望「Ball-er」。