歐國盃睇好三路奇兵

猪拉多纳

萬眾期待，四年一度嘅歐國盃終於打到嚟，論球隊號召力同賽事水準，呢個大賽絕對唔會差得過世界盃好多，加上歐洲主流聯賽收晒咧，所有球迷同菠菜人士都會特別留意歐國盃，預期會掀起一陣歐國盃熱，氣氛肯定好！

今屆賽事喺中歐及東歐舉行，肥叔特別睇好三支該區球隊，分別係波蘭、俄羅斯同克羅地亞，三隊波唔多起眼，如果盤口有利，可以作為重點出擊對象，特別係波蘭有幾個德甲冠軍球隊多蒙特嘅猛將在陣，又有主場之利，絕對不容忽視。另外，法國今屆唔算特別獲睇好，不過呢班波擁有拿斯尼、賓施馬及列貝利等當打球星，絕對有條件突圍，亦係肥叔心水之選！
波蘭鬥希臘捧細

講番揭幕戰推介，波蘭主場鬥希臘，睇牌面波蘭高啲，但要讓波就令人稍有戒心，始終希臘都係一支擅守嘅球隊，分分鐘可以悶和對手。兩隊首戰都唔想輸，難免會踢到有啲綁手綁腳，橫計掂計呢場入波都唔會多，細盤值得捧場。
肥叔心水

波蘭 細

俄羅斯 上盤