捷克+1做俄軍「細」界

猪拉多纳

「東歐雙雄」對決和味濃！歐國盃A組賽事，俄羅斯、捷克咁高咁大，頭炮出場必小心翼翼，手緊腳緊入波唔慌多，細盤1.48倍熱得有理。捷克巴路士上陣成疑、路斯基狀態不足，必求穩主守；俄軍領隊艾禾卡特保守到震，球隊鋒力一般讓波咪搞，可取「讓球客勝」！（now632、660周六凌晨2時45分直播）

自從以俄羅斯的名義出戰大賽後，該隊只曾一次與捷克相遇，就係96年歐國盃決賽周。當時身處C組的俄羅斯頭兩仗皆北，出線無望，在冇心理包袱下，末仗對捷克反而踢得分外起勁。雖先落後兩球，但中場大將莫斯杜禾大發神威，帶領俄軍於完場前5分鐘反先三比二，幾乎完成大逆轉，可惜史米沙最後一刻扳平，令捷克憑較佳對賽成績，力壓意大利進身8強，之後仲殺入決賽。

A組被視為本屆歐國盃最冇睇頭一組，俄羅斯已屬最具星味一隊。俄軍上屆成神奇球隊，但希丁克變艾禾卡特後，靈氣與侵略性已大大減低；最大鑊係主力各有隱憂，艾沙維、柏夫里約真高高峰已過，普格恩耶克演出飄忽，門將艾堅菲夫亦新傷剛愈，再難重演上屆水平。
巴路士上陣成疑

自尼維特、貝加、普波斯基淡出，捷克經歷長時間青黃不接，目前雖仍依靠路斯基揸旗，但已經湧現出華拉夫比拿等新星，整體戰鬥力唔曳。特別係應屆歐聯冠軍車路士門神施治狀態大勇，帶領拍檔謝比施拿斯布防，採取主守戰術，俄軍未必咬得入佢哋。巴路士於操練中受傷未必出得，令捷克攻力更弱，難怪個細盤熱到燙手。

近兩屆大賽（10世界盃、08歐國盃），廿四場分組頭輪賽事，有廿場都係開細，比率超過八成，完全反映球隊謹慎心態。

至於「角球大細」方面開中位數10.5球，雙方都非傳統落底出波球隊，捧細；而「反敗為勝」開出「俄羅斯會否反敗為勝」，預計今仗戰情平淡，俄軍缺乏反勝籌碼，雖然賠率高達11倍，但唔建議捧場。

兩軍都打451陣式，俄羅斯中場由艾沙維領軍發辦，基沙哥夫於前場單打獨鬥，如果效果唔好，柏夫里約真高隨時落場。捷克以鋼門施治最有卡士，其統領防線滴水不漏，係球隊搶分最大籌碼。
經驗豐富 路斯基

捷克十號仔路斯基同樣都係來自阿仙奴，相信佢都好熟悉對手艾沙維嘅打法。近年捷克進入換血期，好多國腳經驗都唔算豐富，有路斯基呢個大哥帶住班後生仔，落到場都淡定啲。路斯基今季喺阿仙奴可謂鹹魚翻生，演出極之搶鏡，話唔定今屆歐國盃可以帶給球迷驚喜。
回勇沙皇艾沙維

俄羅斯十號仔艾沙維，肯定係國家嘅核心人物。雖然去季艾沙維不獲阿仙奴所重用，但以外借身份回歸俄羅斯球隊辛尼特後，表現轉佳兼狀態回勇，相信佢喺國家隊會繼續交出好表現。以俄羅斯最近幾場比賽所見，艾沙維都喺畀領隊艾禾卡特擺到左邊，不過以佢嘅能力，中前場任何位置都可勝任。
兩軍對賽往績

20/6/96　歐國盃

俄羅斯3:3捷克*

*中立場