鹿島貪盃仔新潟唔夠砌

猪拉多纳

戰意係日聯盃分組賽最重要嘅爭勝要素，畢竟每組7隊波要踢成6場分組賽，先至得兩隊出線，完全吃力不討好，難怪聯賽排頭兩位嘅仙台同廣島，都選擇徹底放棄日聯盃。

講到日聯盃最有誠意嗰隊，首推衞冕冠軍鹿島鹿角，佢哋歷來4度捧盃，係日職之冠，今屆4場分組賽亦贏咗3場，暫列B組首位，縱使多數唔會安排首席射手興梠慎三打正選，但今季加盟嘅祖尼奴於日聯盃都有兩球進帳，火力得以保持，最緊要係佢哋冇人踢緊太公波，今晚作客新潟天鵝，兵源唔使擔心。
新潟唔吼日聯盃

對家新潟天鵝雖於B組暫列第3，但只係贏過無心戀戰嘅神戶勝利船同埋札幌岡薩多，事實上佢哋嘅正選前鋒組合般奴盧比斯及矢野貴章，喺今屆日聯盃都唔多出場，就知新潟唔多吼呢個盃仔，況且佢哋近況亦麻麻，近兩仗共失8球之餘，主場更連輸3仗，今場波梗係捧鹿島1.8倍客W，想博過關的話，可以要埋分組賽3連勝嘅清水心跳。（開賽時間：周三晚6:00）
日聯盃分組賽賽制：

由14支毋須參加亞冠盃之日職球隊角逐，分兩組踢單循環分組賽，每組首、次名躋身淘汰賽。