法林明高冇糧出唔抵邦

猪拉多纳

「細哨」朗拿甸奴身為堂堂世界級球星，但有汗出、冇糧出，被法林明高拖欠人工，憤而單方面宣布解約，仲要同球會打官司，要求賠2,000萬美元。法林明高目前受到內外夾擊，士氣大受影響，今輪巴甲作客新升班嘅邦迪比達，莊家只係開平手盤，明顯睇淡法軍，一於捧邦迪比達。（周四早上8時50分開賽）

法林明高係上季巴甲第四名，但今季表現走晒樣，兩戰仲未開齋，皆因球會莫財，出唔到糧畀朗拿甸奴，雙方關係已經破裂，「細哨」已轉投明尼路，佢被影到早前集訓時同一名女子開房，法軍紀律立立亂。依家最令人擔心係其他球員會學「細哨」劈炮，到時整支球隊肯定散晒。就算以波論波，邦迪比達都唔失禮，近六次主場對法林明高取得四勝二和，屬於對手剋星，今仗趁火打劫，有力贏埋。
山度士死火吼細

另一場巴甲，明尼路主場對巴希亞，主隊雖然開咧後兩連勝，但都係小勝一比○，主W過熱唔抵玩，「讓球主勝」風險太高，建議要入球細。另外，山度士今季死晒火，兩場聯賽都同對手互交白卷，今次主場對富明尼斯，再追入球細。