歐國盃：3大熱門選擇

猪拉多纳

•德國以往6次入決賽有3次攞冠軍，前西德更加試過喺76年、80年同84年連續3屆取得決賽資格，鍾意捧熱門嘅話，決賽組合又點可以唔預佢哋；西班牙連續稱霸08年歐國盃同10年世盃，實力唔需要多講，而且只要兩隊齊齊小組首名出線，就會到決賽至碰頭，大賽專家搭最強球隊有8.5倍，絕對諗得過。
德國 Vs 荷蘭（7倍）

•德國除咗喺歐國盃有輝煌戰績外，作為佢哋骨幹嘅拜仁又係今季德甲、德國盃同歐聯3亞王，可見班球員同決賽好有緣。至於天才輩出嘅荷蘭，歷來只係試過喺88年捧盃時入過決賽，不過佢哋貴為南非世盃亞軍，人腳又同當時相差無幾，相信今屆都有機會再度問鼎寶座。
西班牙 Vs 法國（16倍）

•西班牙歷史上3次殺入決賽兩度捧盃，今屆人腳不整但都唔可以睇小，何況佢哋喺外圍賽8戰全勝出線，表現相當穩定牌面唔曳；儘管法國主帥白蘭斯自認今屆捧盃無望，但要記得06年法國都喺領軍能力有限嘅杜明歷麾下入到世盃決賽，所以咪睇輕佢哋嘅潛力。