歐國盃：賽事編號：11 小組一二名投X心法

猪拉多纳

推介：波蘭首名、俄羅斯次名

歐國盃A組首選5.7倍「波蘭首名、俄羅斯次名」組合，波蘭身為主辦國一定場場搏命，即使提早取得出線權，亦唔會留力，尤其係另外三支對手實力唔算強，相信波蘭會以首名出線為目標，爭取喺國民面前揚威。次名可揀俄羅斯，俄國上屆打入四強，級數有番咁上下，晉級機會甚高，呢個組合甚為穩陣。

另外，希臘深受國內債務危機困擾，球隊有冇獎金都成疑問，估計難以出線，可以先行剔走。
荷蘭搶慣韁有辦睇

推介：荷蘭首名、德國次名

B組屬於德國、荷蘭及葡萄牙之爭，葡軍靠晒基斯坦奴朗拿度搵食，但C朗踢大賽往往冇料到，因此首先考慮「荷德配」，當中首選4.2倍「荷蘭首名、德國次名」。

雖然德國大賽成績一向有保證，但就比較慢熱，兩年前世界盃分組賽試過失準輸畀塞爾維亞，上屆歐國盃分組賽屈居克羅地亞之下，次名出線，但最終都打入決賽。荷蘭上屆歐國盃及世界盃分組賽都係全勝首名出線，值得再追捧。
意大利醜聞愈多愈醒

推介：意大利首名、西班牙次名

歐國盃分組賽C組係西班牙同意大利之爭，但「西班牙首名、意大利次名」組合熱至2.9倍，冇乜肉食，唔多吸引。西班牙近年喺國際大賽屢創佳績，不過，高峰過後球員難以保持鬥心，特別係巴塞隆拿戰將稍有跌Watt，隨時影響國家隊演出。

大賽專家意大利喺歐國盃前又爆出「賭波門」醜聞，不過，呢班波向來唔怕負面消息，有機會喺分組賽爆發，「意大利首名、西班牙次名」有6倍，一試無妨。
法國四平八穩做膽材

推介：法國首名、烏克蘭次名

D組名牌英格蘭本來被視為出線熱門，不過，呢班波頭兩場冇咗王牌前鋒朗尼，難以予人信心，若然想求好分頭，不妨考慮飛起佢哋。睇勻D組幾隊，法國表現四平八穩，最有機會取得首名出線，可以作為小組首名的鐵膽，「法國首名、瑞典次名」組合有9.25倍，值得一試。

另外，東道主烏克蘭佔地利，亦有機會取得次名晉級，「法國首名、烏克蘭次名」有8倍，亦係另一個分頭唔錯嘅選擇。