愛爾蘭又老又殘剝「牙」冇攻「細」

猪拉多纳

又老又殘，絕對係愛爾蘭目前寫照。匈牙利（右圖紅衫）今晚喺熱身賽主場對愛爾蘭，入球細最啱玩，事關愛爾蘭難得進軍歐國盃決賽周，但傷兵問題始終搞唔掂，為免再有主力受傷，教頭查帕東尼肯定會吩咐球員錫身啲，何況愛爾蘭係今屆歐國盃平均年齡最大球隊，邊似撻得着先？（開賽時間：周二凌晨2:30）

首先唔好誤會，我絕對係愛爾蘭支持者，02年世盃佢哋踢4場全部收錢，即使16強輸畀西班牙都係加時至冧檔，而且隊長羅比堅尼係我以往玩CM（電腦足球經理遊戲）必然收購。可惜愛爾蘭依家受到嚴重傷兵問題困擾，中場基夫法希爾同後衞奇雲科尼分別退隊，後衞奧沙同門將基雲又未徹底康復。
匈牙利謝拉缺陣

雖然羅比堅尼有份喺上場贏波斯尼亞嘅熱身賽正選上陣，但佢根本未好番晒，落場難免就住，更何況今次愛爾蘭大軍平均年齡28.35歲，係今屆平均年紀最大球隊，比起俄羅斯同瑞典老化問題更嚴重，所以話佢哋又老又殘唔係唱衰，而係現實情況確唔容許佢哋喺熱身賽亂搏。

匈牙利唔好得幾多，隊長謝拉因傷唔能夠接受徵召冇份，原本有份入選嘅中場夏捷拿同布斯沙基，最終因有傷甩底冇歸隊，攻擊力難免大打折扣。再講，日前匈牙利以2:1打爆捷克，主要係因為開波初段迪素迪沙基偷雞快射罰球得手，完場前又有古斯高難得窄位抽入，其餘時間入肉攻勢唔多，唔似再開入球騷。
橫數千軍

 匈牙利交手連敗

‧近2次對賽全敗。

‧連續4場有波入。

 愛爾蘭連開5場半場細

‧連續5場開半場細。

‧近6場4次半場領先2次打和。