英獅未瞓醒 冇本事發威

猪拉多纳

英格蘭新領隊鶴臣今晚首度帶隊出擊，作客奧斯陸同挪威拍跳，不過朱楓就覺得鶴臣唔似可以打響頭炮，皆因呢隻「沉睡獅子」最近內訌之餘仲飽受傷患；挪威隊中有多位英格蘭「臥底」，近況同主場威力都唔講得笑，加上往績又有優勢，呢場絕對有本錢開出1.68倍「讓球主勝」！（now632台及廣東體育周日凌晨2:45直播）

「三獅兵團」喺2012年黑到爆，先有領隊卡比路因不滿泰利被褫奪隊長憤而劈炮，本來外間睇好熱刺領隊夏利列納接任，點之英格蘭足總最後竟然搵鶴臣嚟教，仲要一簽就簽約4年。

唔係話朱楓有偏見，鶴臣近年教波戰績真係幾唔掂，處理人事亦一般，先因為拆唔掂泰利同里奧費迪南嘅不和，怒飛里奧出隊，最近仲因為不滿曼城右閘米卡李察士拒絕擔任後補名單，結果小器到搵喺利物浦連正選都冇嘅馬田基利入隊，就知佢根本係「麥卡倫二世」。
門將魯迪退隊補選英乙仔

可能因為咁連個天都唔幫佢，近日鶴臣主持英格蘭首課操練，就有前鋒韋碧克同右閘格連莊臣因傷練唔到，前鋒朗尼仲因為腳趾受傷，鶴臣索性畀佢放多一個禮拜假，唔預佢踢呢場熱身賽。加上中場謝拉特、柏加同禾確特近日都先啱啱傷愈復操，車路士三寶林柏特、泰利同艾殊利高爾又啱啱慶祝完歸隊，最慘係連第3號門將魯迪都話星期四操練斷咗手指骨被迫退隊，搞到要補選今季由英冠伯明翰外借去英乙車頓咸嘅畢蘭特。英格蘭睇落真係好似完全未Ready好打歐國盃。
挪威主場7戰6勝

挪威早前喺歐國盃外圍賽H組，僅因對賽成績唔及葡萄牙出局。雖然呢支由奧臣帶領嘅球隊，今場有中場洛特維迪同後衞湯馬斯洛尼因傷退隊，好彩仲有懷斯、軒治蘭特同摩頓柏達臣等5名効力英格蘭聯賽嘅「臥底」在陣，可謂好熟路，再睇埋挪威近8場獲6勝2負、近7場喺奧斯陸主場出擊更未輸過獲得6勝1和，當中贏過法國同葡萄牙兩支勁旅，近5次對英格蘭仲未輸過添，就算今晚贏埋英格蘭都唔意外啦！
橫數千軍

挪威近5次交手不敗

‧近8場6勝2負，僅得1場食白果。

‧近5次交手未輸過，獲2勝3和。

英格蘭連開3場單

‧近8場4勝3和1負，連續3場開單。

‧世界排名第7，比排第24位嘅挪威高17位。