丹麥搶Ｗ磨利劍

猪拉多纳

今晚有多場國際熱身賽，打頭陣丹麥對巴西，今場波喺中立場德國漢堡舉行。巴西今次可謂以「B隊」出戰，特別係中前場以巴甲聯賽年輕球員為主，經驗不足之餘，仲要千里迢迢飛去歐洲比賽，實在非常蝕底。丹麥備戰歐國盃，人腳齊整，有力擊敗「森巴兵團」。（now 632周六晚9時30分直播）

大家唔好受巴西名氣誤導，睇下領隊文奴文尼斯今次揀選嘅名單，令人不敢恭維，中前場十一人有七個屬於巴甲土炮，另外幾位「海外兵」亦只係大衞雷斯、辛度雲尼亞里、侯克、「玻璃腳」柏圖、迪尼普中場古利安奴，屬於B隊「卡士」。
新人王尼馬未必落場

另外，新星尼馬剛踢完自由盃，好可能缺陣，即使有份參戰，但行程咁緊密，亦會影響發揮。由於巴西係2014年世界盃主辦國，唔需要踢外圍賽，文奴文尼斯會盡量利用熱身賽，試用新人，特別係目前屬試驗初步階段，更加唔會在意賽果，最重要係搵到合適新血。

丹麥有歐國盃重任在身，比賽態度自然會比較認真，而且賓特拿等主將都在陣，實力唔比巴西B隊差。值得一提，丹麥喺歐國盃同三支進攻型球隊德國、荷蘭及葡萄牙同組，因此今仗對巴西，練兵價值極高，丹麥一定會把握機會，踢場好波，如果贏到巴西，對提升球員信心大有幫助，佢哋應會全力以赴。