伊蒂哈德主場踩多腳

猪拉多纳

亞冠盃十六強西亞區賽事開波，伊朗球隊柏斯波利斯作客沙特阿拉伯勁旅伊蒂哈德，柏斯波利斯聯賽戰績極曳，引發大批球迷不滿，隊長卡里米決定跳船，已表明將會離隊，球隊士氣低落，勢將輸波出局！

（周四凌晨2時10分開賽）
卡里米冇腰骨表明要走

柏斯波利斯今季聯賽位列中游，表現走晒樣，大軍於亞冠盃分組賽第五輪主場對希拉爾踢到不知所謂，以其陣上表現輸五、六粒都仲得，雖然最終僅輸0比1，但已辣慶一眾支持者，大批球迷抗議球隊戰績差劣，令隊內職球員相當難受。

喺呢個危難時刻，前拜仁球星卡里米不但冇安撫球迷，更表明會於今季約滿後離隊。卡里米身為柏斯波利斯隊長，卻完全冇腰骨，仲講埋啲風涼說話，話球隊可以簽到個比佢更好嘅球員喎，隊中大牌球星去意已決，軍心不穩，難有作為。

伊蒂哈德係沙特阿拉伯頂級勁旅，曾經兩度奪取亞冠盃冠軍，大賽經驗非常豐富。大軍今屆於分組賽六戰五勝一和，主場三戰全勝，表現相當搶鏡，今次再於主場出擊，優勢十分明顯，現時主勝分頭唔算差，絕對值得一試！
賓尼耶斯主帥大報復

同日阿聯酋球會賓尼耶斯造訪沙特阿拉伯勁旅希拉爾，賓尼耶斯阿根廷籍名帥卡達朗上年教緊希拉爾，拎完聯賽冠軍都畀人炒，梗係懷恨在心啦，佢熟晒舊東家路數，今次倒戈肯定有仇報仇，受讓博「讓球客勝」。
亞洲聯賽冠軍盃16強

東亞區

30/05/2012 蔚山現代 Vs 柏雷素爾

30/05/2012 ＦＣ廣州 Vs ＦＣ東京

29/05/2012 阿德萊德聯 Vs 名古屋鯨魚

29/05/2012 城南一和 Vs 賓約哥

西亞區

24/05/2012 希拉爾 Vs 賓尼耶斯

24/05/2012 伊蒂哈德 Vs 柏斯波利斯

23/05/2012 沙巴罕 Vs 艾斯迪格拿

22/05/2012 艾查捷拉 Vs 吉達艾阿里

註：前者主場