歐國盃：一切由96歐國盃開始

猪拉多纳

94年世界盃，係朱楓首項接觸嘅大賽，但記得當年之所以留意，全因一間大型快餐店推出相關宣傳活動，當時根本唔係為睇波，想換免費飲食先係主要目的，所以認真計算，96年歐國盃先係朱楓同足球結緣嘅首項大賽，亦由該年起，小弟開始鍾意德國，直至今時今日。

當年德國真係好勁，後防有「自由人」森馬一夫當關，前線就有朱楓首位足球偶像─「金色轟炸機」奇連士文孭飛。記得當年德國首兩場已盡顯霸氣，先後輕取捷克同俄羅斯，點知第3戰硬撼爭標熱門意大利就一直陷於苦戰，好彩門將高普基一早救出蘇拿嘅12碼，加上克服史圖恩斯喺下半場一早被逐嘅劣勢，最終逼和0:0，唔止以首名出線，仲令意大利出局。原來睇住愛隊出線，再睇唔鍾意嘅球隊同時間出局，會係咁開心嘅。
盼德國再創佳績

進入8強後，德國成功擊敗克羅地亞晉級，4強硬撼死敵英格蘭，呢場波當時好矚目，好記得當時身邊所有朋友都鍾意英格蘭，為免被排斥，所以德國最後射贏12碼後，朱楓都只係暗自開心。到咗決賽，德國面對分組賽手下敗將捷克，本來朱楓以為德國贏硬，點知踢落近乎五五波，好彩德國突然殺出比亞荷夫呢位超級後備，最終成功捧盃。諗番起以上幾個重要時刻，就好似尋日先發生，但願今屆歐國盃，德國可以再次踢出佳績，取代朱楓嗰啲陳年回憶！