主仁「大」晒 空襲殘車搶「冠軍」

猪拉多纳

論戲碼，今屆歐聯決賽拜仁對車路士未必夠上年巴塞對曼聯震撼，但兩隊喺準決賽踢走「西甲雙雄」確實表現出色。球迷除咗可以喺屋企睇3D直播外，連戲院都有得睇3D決賽，聽講戲院依家只剩番前排或者好偏嘅位置，證明呢場決賽絕對萬眾期待。名家阿Kit同阿占當然唔會錯過呢場好波，佢哋仲分別睇好拜仁捧盃同1.9倍入球大，預期場波好睇過戲！（有線61、64、201、203及204（3D）、中央5台周日凌晨2:45直播）
拜仁拆「車」吐烏氣

雖然話上星期場德國盃決賽，拜仁輸畀多蒙特輸到冇聲出，但其實今季拜仁踢本土同歐洲賽表現好似兩隊波咁，大家仲記得佢哋4強作客皇馬氣勢重好過主隊，莫連奴都要寫個「服」字！只要射手馬里奧高美斯翻炒利物浦用安祖卡路爾轟死車仔呢招，拜仁就更加勝券在握。
大衞雷斯頂唔住高美斯

雖然車仔季尾愈踢越勇，贏埋個足總盃冠軍，但佢哋中後場總共有4件主力停賽，受影響程度比拜仁嗰3件大好多，正選要出番大衞雷斯呢個爆炸頭？搞笑就得，但要頂住馬里奧高美斯？好難喇！

其實好少球隊會咁好彩歐聯決賽可以返自己地頭踢，拜仁今晚做「主仁」嘅機會話萬中無一！況且佢哋今季本土賽畀多蒙特騎住鬱埋鬱埋，今晚一定全力出擊搵呢架陣容不整嘅「殘車」出氣！無論係理性分析定情意結，小妹今晚都必定着我嗰件喺慕尼黑機場買嘅拜仁波衫，支持佢哋捧盃！
歐聯賽制

今輪為決賽，於慕尼黑安聯球場舉行，以一場過分勝負，若法定時間內打成平手，需加時作賽，再和就互射12碼決勝。

KIT推介：拜仁（冠軍）

有線球彩台主持KIT

電郵：soccer64@cabletv.com.hk

PHONE波熱線：1831 678

「球彩俱樂部」開放時間：周六晚11:00至11:59