3D首播歐聯決賽

猪拉多纳

27年前嘅519，香港足球代表隊歷史性喺世界盃外圍賽擊敗中國，寫入香港足球史冊光輝一頁；今年519，就係歐聯爭霸之夜，由拜仁慕尼黑迎戰車路士，仲要係歐聯決賽第一次有3D製作。我哋有線同戲院同時會以3D直播，咁呢場波過程又會唔會引為一時佳話呢？考慮到雙方防線同樣存在不穩問題，決賽場合拜仁要讓到半一真係唔多值博，玩入球大仲穩陣啦！
車仔中堅執位影響大

經過漫長分組賽同淘汰賽後，拜仁同車路士分別半爆冷擊敗多支名牌勁旅殺入決賽，可惜嚟到今晚咁重要日子，雙方都有多位主力因為紅牌或累積黃牌夠數而無緣決賽。不約而同兩隊缺陣嘅主力都係集中喺中後場，尤其係車路士一對守將泰利同伊雲洛域都唔能夠上陣，對於佢哋嘅防守有好大影響！

拜仁雖然季尾接連失落聯賽同德國盃冠軍，好彩班攻擊球員狀態仍然相當唔錯，列貝利、洛賓同馬里奧高美斯嘅「鐵三角」組合威力仍在，喺主場之利之下，要攻破車仔天殘地缺嘅後防線冇難度！

車路士最終只能排英超第六過終點，如果今場捧唔到盃，下屆就只能夠踢歐霸，老闆阿布拉莫域肯定唔收貨！球隊自從由迪馬堤奧接手後成績大大改善，今場波都唔可以完全睇淡佢哋呀！

最後要多謝各讀者今季支持「球彩全女打」，踢埋今場歐聯決賽，我哋都會嚟個小休，期望下季有機會再喺呢度同各位東方讀者講波經！