拜仁勢顯安聯霸權

猪拉多纳

歐聯王者戰！拜仁慕尼黑今晚將於安聯主場迎戰車路士，今仗係歐聯改制後，首次有球隊喺主場踢決賽，拜仁優勢明顯，加上拜仁中場實力明顯遠勝車路士，黑柴相信主隊可以喺90分鐘內解決對手捧盃，拜仁讓半一，黑柴捧上盤。（有線61及201台周日凌晨2時45分直播）
今屆歐聯主場全勝

今屆歐聯未展開前，歐洲足協已將決賽定在安聯球場舉行，整定拜仁有運行。拜仁啱啱喺德國盃決賽慘敗於多蒙特腳下，不過德國盃對拜仁只係小菜一碟，經過該役慘敗亦有助球隊認清本身問題所在同降溫。拜仁主場踢歐聯近15場贏咗14場，今屆更加7戰全勝，所贏對手仲包括英超同西甲盟主曼城同皇家馬德里。

相反，車路士作客奇差，今屆歐聯6場作客只1勝，英超作客19仗亦只贏得6場，而且隊長同精神領袖泰利停賽。車仔今季作客賽事，泰利共缺陣5場，成績1和4負，先後喺英超輸過畀愛華頓、西布朗、曼城，歐聯亦輸過畀拿玻里，今場冇咗泰利係一大打擊。
魔翼拉邊破車桶陣

車仔準決賽作客魯營球場創造奇迹，於大部分時間10人應戰下賽和巴塞隆拿，兩回合計贏3比2將對手踢出局，但奇迹可唔可以喺短期內再次發生呢？巴塞喺準決賽兩回合正處於低潮，而且多次中楣中柱，車路晉級存有幸運成分，何況同巴塞一味喺中路地面組織有別，拜仁有列貝利同洛賓一雙魔翼於邊線發難，前線有馬里奧高美斯衝鋒，後上亦有湯馬士梅拿、卻奧斯同舒韋恩史迪加支援，進攻模式更立體多變，車仔想死守亦未必可以照辦煮碗。

兩軍今仗合共有7名球員要停賽，包括拜仁畢斯杜巴、阿拉巴同路爾斯古斯達禾，車路士泰利、伊雲洛域、拉美利斯同魯爾梅利斯，表面上損失差距唔大，不過中場向來係拜仁最強項，今仗中場比起車仔更齊腳，尤其季尾得到保護嘅「小豬」舒韋恩史迪加蓄勢待發，極有機會成為今仗致勝關鍵。