蔚山現代爭首名反轉東京

猪拉多纳

打波同做人一樣，黑起上嚟幾叻都死，好似今日亞冠盃F組謝幕戰，FC東京作客南韓嘅文殊球場對蔚山現代，臨開波前又多件中場傷咗，防線仲要執過位，點同人爭小組首名呀？今場波寧博蔚山1.72倍主W。（now671台周三晚6:30直播）
首名出線 16強有主場之利

東京、蔚山响F組同得11分，早就攜手出線，今場只係首次名之爭。由於東京主場對蔚山打和2:2，而東京嘅得失球較佳，咁即係話，蔚山今鋪一定要全取3分，先可以做到F組「一哥」，响16強淘汰賽有主場之利，避開其他小組首名，所以佔地利嘅蔚山一定會搏盡喪攻。講到鋒力，大家更加唔使擔心，事關蔚山出名「猛火」，呢班波近6戰場場有波入，總共有10球進帳，今晚齊章出擊，唔似會突然啞火。
東京中堅變右閘 防線執位

至於和波都掂嘅東京，賽前嘅口號係爭取「F組第一」。但係講得出未必做得到，事關FC東京本來就有中場大竹洋平、前鋒平山相太養緊傷，估唔到前一日課操練，大髀傷患剛啱康復嘅田邊草民，居然又整到右手中指骨折，家陣證實起碼要抖兩個月，少埋呢個萬能型中場，近5戰失咗7粒嘅FC東京想守和蔚山真係好難，一旦落後焗攻，仲會非常牙煙添。

最攞命嘅係，太田宏介尋日發燒，今日多數唔使預佢，焗住東京要搵中堅張賢秀取代太田踢右閘，條防線咁樣執位法，畀蔚山強攻打瓜一啲都唔奇。
亞冠盃賽制：

32支球隊分8組進行雙循環分組賽，每組首、次名躋身淘汰賽，小組首名將於一場過的16強淘汰賽獲得主場之利。