櫻花強陣發圍

猪拉多纳

日本聯賽盃向來只屬雞肋，有唔少球會都用作練兵，排陣往往成為勝負關鍵！廣島三箭唔多重視聯賽盃，慣性收起王牌前鋒佐藤壽人，今輪於A組賽事作客大阪櫻花難有作為，蘇豪捧主勝！（周三晚6時開賽）

每支球隊對待盃賽態度都唔同，廣島三箭幕後人似乎有意用聯賽盃試陣兼練兵，佢哋慣性收起王牌前鋒佐藤壽人，一心畀班後備兵寓賽於操，後備前鋒石原直樹屬聯賽盃鐵膽，小將大崎淳矢同石川大德亦獲得唔少落場機會，用呢個陣容同其他球隊交手，難免較為蝕底，三箭分組賽兩戰不勝敬陪末席，戰績已反映會方取向。

大阪櫻花分組賽兩戰一勝一負，上場大炒浦和紅鑽發揮出色，相比之下可見佢哋都幾有心爭聯賽盃，並冇收起主將清武弘嗣，有時仲安排外援愛華頓甘比斯及白蘭昆奴落場，甚至搵埋隊中首席「士哥拿」金甫炅落場搏殺，態度認真。另外，櫻花本身後備力量強勁，播戶龍二及永井龍等後備前鋒都有分量，戰鬥力遠勝三箭，今場贏面較高。
岡薩多殘陣益松鼠

同日B組賽事大宮松鼠主場對札幌岡薩多，岡薩多有接近十位球員養傷，人腳唔多完整，球會於聯賽位列榜尾，預期成季都要護級，實在冇乜多餘力氣分心爭盃，況且球隊就算有心爭都恐怕無能為力，佢哋喺分組賽三戰一勝兩負，形勢唔算好，倒不如慳番啖氣喺聯賽搶分好過，一於熱捧松鼠Ｗ！