阿仙奴強鋒摧毀史篤城

猪拉多纳

28/04/2012
文： 走肖

車路士殺入歐聯決賽，今季英超4哥好可能悲劇性錯過下屆歐聯，現時阿仙奴只係領先紐卡素3分，而且打多場，為確保進軍歐聯6.3億港元收入，餘下3戰1分都不能少。史篤城今晚喺英超主場對阿仙奴，隨時變炮灰，兵工廠1.72倍客W追得過。（有線200、300及廣東體育周六晚10：00直播）


形勢上車仔唔似入到英超前4名，但如果佢哋喺歐聯決賽打爆拜仁捧盃，就會以衞冕冠軍身份直入下屆歐聯，咁即係話，英超得番前3名可以去歐聯掘金。雖然阿仙奴目前排第3位，但其實佢哋比紐卡素及熱刺踢多場，唔覺意失分就可能跌落第4，到時就真係喊都無謂，剩低3戰絕對要搵命博。

尹佩斯騷哥利博跳槽

兵工廠唔能夠甩開對手，主因係隊長尹佩斯腳風回落，個人近7戰僅得1個入球，仲要係12碼嚟嘅添，不過入球量下降，亦唔代表尹佩斯廢武功，事關上場佢對車仔就試過埋門中楣又中柱，入唔到波只係唔夠運。消息話祖雲達斯已派高層去倫敦，開價3,000萬歐元撬佢過檔，加上曼城話要用22萬鎊周薪簽佢，呢場唔騷哥利點得？

史篤城近8戰僅1勝

事實上，尹佩斯拖到依家都唔肯續約，跳槽搵大錢心態好明顯，但佢始終對兵工廠有感情，好來好去都應該會幫手搏個聯賽第3名，確保下屆歐聯5,000萬鎊收入落袋至離開。咪忘記尹佩斯依家只要入多4球，就可以打破亨利保持單季入30球嘅球會紀錄，即使兵工廠有禾確特同阿迪達傷埋，但對住近8戰只得1勝嘅史篤城，阿仙奴依然有條件開W！

橫數千軍

史篤城鋒力一般


近4場聯賽被對手先開紀錄。

近14次英超得2場入多過1球。

阿仙奴作客多波入

近5場作客聯賽均有入球。

對上5次作客史篤城只得1勝。