韋根追素救命

猪拉多纳

28/04/2012
文： 蘇豪

英超護級精讀班最後召集！現時榜尾形勢緊湊，除狼隊鐵定降班外，第十五至十九位只有五分之差，五隊只能活三隊，為保住英超席位，各軍餘下每戰都會當盃賽決賽咁砌，今晚先有韋根、保頓同阿士東維拉分途出擊，其中韋根於主場迎戰新Big4紐卡素，憑着近期強勁氣勢及地利，有望搶分而回。（有線204及304台周六晚10時直播）


英超護級球隊韋根季尾變身強隊殺手，鬥親勁旅例有佳作，今輪主場迎戰四哥紐卡素又會使出全場緊迫踢法，務求令對手吃盡苦頭，有力終止對手六連勝強勢。

砌低紅魔 唔勁唔贏

韋根季尾衝刺階段全面上力，近六場聯賽贏四場，先後戰勝曼聯、利物浦同阿仙奴，唔勁唔贏！喺領隊馬天尼斯帶領下，韋根踢法非常機動，表面上打三個後衞，但防守時兩側球員都會移後幫手，進攻嗰陣又有馬隆尼同域陀摩西斯支援射手迪山度，攻守都極具效率。當面對強隊之時，大軍會作出全場緊迫，完全唔畀對手上腳，佢哋就係用呢種踢法逼死曼聯，絕對唔簡單！


紐卡素近期氣勢如虹，連續六場聯賽贏波，射手柏比斯施斯場場都有士哥，腳風確係好順。不過，「喜鵲」能夠連場報捷，某程度上係因為賽程易踢，佢哋對上六戰最強對手只係利物浦，仲要係處於低潮兼無心戀戰嘅「紅軍」，兩場作客勝仗對手分別係踢緊風流波嘅西布朗同史雲斯，真正考驗唔多，今場面對近期專搞強隊嘅韋根，真正遇上考驗，要過呢關絕對唔易。

近5主場4挫紐卡素

韋根連場戰勝勁旅後，球員心態上已經唔怕面對前列球隊，今次對住升咗呢嘅紐卡素，又會激起呢種征服勁旅嘅鬥心，有機會再次踢出超水準。翻查往績，韋根近五次英超主場對「喜鵲」贏四場，本身就唔怕佢哋，今場可捧「讓球主勝」！

五支護級球隊

15.阿士東維拉 36分

16.昆士柏流浪 34分

17.韋根　　　 34分

18.保頓　　　 33分

19.布力般流浪 31分

註：第20位狼隊已肯定降班