巴塞車仔世紀大戰

猪拉多纳

24/04/2012
文： KIT

歐聯4強次回合開火，4強為殺入安聯球場決賽最後火併！今晚車路士帶住一球優勢作客巴塞隆拿，若然畀佢哋偷雞先入一球，巴塞必定大舉進攻務求反勝；就算畀巴塞入波先佢哋都會爭取拉開比數，咁嘅局面呢場絕對係世紀「大」戰，即使大細中位數調高到3.5球，小妹都膽粗粗捧2.15倍入球大！（有線61、64、201及204、中央5台周三凌晨2：45直播）


巴塞躉呼籲用番碧基


巴塞鋒力有幾勁唔使多講，不過對佢哋防守力就有啲懷疑，睇吓啱啱輸畀皇馬場波，佩奧爾累輸嘅第1球就夠晒搞笑，跟手下半場又畀C朗突擊搞掂，咁啱車仔嘅杜奧巴同桑馬達都係爆得之人，有佢哋打突擊隨時玩死門將域陀華迪斯。所以《世界體育報》啱啱有一個多達55,000名巴塞球迷嘅投票認為，巴塞應該出番碧基打中堅，同踢番433穩住番後防，而前面就用法比加斯踢「9號半」位攻堅咁話。


美斯休操1日抖足搏殺


小妹諗來諗去，其實呢場波開入球細嘅唯一機會，就係車仔守得住！不過面對巴塞排山倒海嘅攻勢，即使上回合靠自己球場條門柱幫手頂得住，但今晚去到個場大得多嘅魯營隨時又唔同講法，何況美斯响星期日冇練波抖咗一日，佢回過氣表現應該好過响國家打吡。




況且相信車仔今場唔會一味死守，話晒佢哋近9場有6勝3和不敗，今場只要偷到一個作客入球，巴塞就要入番3粒先掂，所以斷估車仔點都想博番一粒！佢哋上場作客阿仙奴勒住踢，明顯係留力今鋪搏殺，加上休戰一場嘅「弗獸」杜奧巴會復任正選，車仔要入波絕對唔係冇可能，入球大有機o架！




賽制：歐聯4強採主客兩回合制，今輪為次回合，若兩回合總比數賽和，以作客入球較多一方為勝，若作客入球相同，則在次回合後加時30分鐘，若雙方在加時取得相同數量入球，由作客球隊獲勝，若加時沒有入球，則互射12碼分勝負。


橫數千軍


巴塞歐戰主場勝率高

‧近15場歐洲賽主場取得13勝2和。

‧對上11次交手得3勝4和4負。

車仔16戰半場不失

‧連續16場半場不失。

‧過去13次作客西班牙球隊得3勝5和5負。

KIT推介：巴塞隆拿（入球大）

有線球彩台主持KIT

電郵：soccer64@cabletv.com.hk

PHONE波熱線：1831 678

「歐聯戰略館」開放時間：周二晚10：30至11：45

賽果熱線：2707 9900　周三凌晨2時50分起至晚6時止