護級關鍵戰保頓「+1」發維

猪拉多纳

24/04/2012
文： 蘇豪

英超兩支悲情球隊今輪正面交鋒，阿士東維拉主場對保頓，維拉隊長柏杜夫患血癌，保頓中場梅姆巴差啲因心臟病過身，兩軍經歷艱難時期，現時都要護級，維拉三線主力缺陣，用上大批年輕球員，關鍵時刻輸經驗，要「讓球客勝」！


（有線300及200台周三凌晨2時45分直播）


今場聯賽原定安排於上月舉行，但由於保頓中場梅姆巴喺足總盃對熱刺因心臟病發突然倒下，所以延至依家先進行補賽。正當梅姆巴情況逐漸好轉，上月尾又傳來維拉隊長柏杜夫患血癌，已無緣披甲。兩軍同病相憐，而且均需護級，倒數第二保頓落後尾四韋根4分，維拉今場若輸波，就會畀保頓追到差3分，所以兩隊今場都唔衰得。

維拉小將頂檔經驗輸蝕

阿士東維拉季尾淪落到要護級，皆因多名大將不在陣中，中場缺少柏杜夫嗌住班波，防線冇咗大舊佬李察鄧尼，致命傷係王牌前鋒戴倫賓特要長抖，三線重心球員冇晒，被迫起用尼敦巴卡、基斯靴特同安祖斯韋文等年輕球員，維拉青訓產品質素高，但呢班小將仲未成熟，難當重任！


保頓護級形勢危急，雖然中場麥克戴維斯有傷上陣成疑，但去到生死時刻無論冇咗邊個都要搏，今場拎1分幫助唔大，必以3分為目標。保頓今季聯賽作客五勝十一負，非贏即輸，今次實豁出去同對手死過，球隊本季喺英超八次先開紀錄，最終取得七勝一和，如能先拔頭籌，有望帶到尾。